Лондоннинг «Челси» клуби Англия Премьер-лигасининг 34-турида «Брайтон»га қарши баҳсда йирик ҳисобда (0:3) имкониятни бой берди.

Учрашувнинг 3-дақиқасидаёқ Ферди Кадиоғлу ҳисобни очган бўлса, иккинчи бўлимда Жек Хиншелвуд ва Данни Уэлбек «чайкалар»нинг ғалабасини мустаҳкамлашди.

Эътиборли жиҳати, лондонликлар илк голни бурчак тўпидан сўнг ўтказиб юборишди. Бу жорий мавсумда «Челси» дарвозасига бурчак зарбасидан сўнг киритилган 11-гол бўлди. Opta маълумотларига кўра, бу клубнинг 31 йил олдинги (1994/95 йилги мавсум) антирекордининг такрорланишидир. Ҳозирда фақат «Вест Хэм» (15 та гол) АПЛда бурчак тўпларидан «Челси»дан кўра кўпроқ гол ўтказган.

Лиам Росеньор шогирдлари Премьер-лигада кетма-кет бешинчи мағлубиятини қабул қилиб олди ва турнир жадвалида 7-ўринга тушиб кетди.