Лондоннинг «Челси» клуби бош мураббийи Лиам Росеньор жамоанинг охирги вақтлардаги муваффақиятсиз иштирокидан сўнг жиддий босим остида қолмоқда. Инсайдер Грэм Бэйлининг маълумотларига кўра, инглиз мутахассисининг келажаги ҳозирча ноаниқ.

Таъкидланишича, АПЛнинг 33-турида «Брайтон»дан учралган йирик мағлубиятга (0:3) қарамай, «кўклар» раҳбарияти Росеньорни дарҳол истеъфога чиқармоқчи эмас. Клуб босслари мураббийга мавсум якунига қадар қолган 5 та ўйинда вазиятни ўнглаш учун имконият беришга қарор қилган.

Шу билан бирга, «Челси» раҳбарияти воқеалар ривожи салбий давом этган тақдирда Лиамни алмаштириш бўйича захира режаларини ҳам тайёрлаб қўйган. Ҳозирда мутахассис ўз лавозимида қолиш учун қолган учрашувларда натижа кўрсатиши шарт.