«Реал Мадрид» собиқ ярим ҳимоячиси Гути, Ла Лиганинг 33-туридан ўрин олган «Алавес»га қарши ўйиндаги (2:1) голидан сўнг мухлислардан узр сўрагани учун Винисиус Жуниорни танқид қилди.
Винисиус учрашувнинг 50-дақиқасида гол урди ва шундан сўнг кафтларини бирлаштириб, боши узра кўтарган ҳолда мухлислардан узр сўради ҳамда клуб эмблемасини ўпди. Ўйин бошланишидан олдин «Сантьяго Бернабеу»даги мухлислар бразилиялик футболчи ва Килиан Мбаппени ҳуштаклар билан қарши олишган эди.
«У бундай қилмаслиги керак эди. Яхши ёки ёмон ўйнаш мумкин, лекин у доим ҳаракат қилади. Охирги ўйинларда у жуда юқори даража кўрсатмоқда ва ўйинчи ҳеч қачон ўз иши учун узр сўрамаслиги керак», — деди Гути DAZN эфирида.
