«Хетафе» аъзоси Хуан Иглесиас ва «Реал Сосьедад» сардори Микель Ойарсабаль ўртасида можаро келиб чиқди. Ла Лиганинг 33-тури доирасида кечган баҳсда «Хетафе» меҳмонда 1:0 ҳисобида ғалаба қозонди.

Ўйин якунлангач, меҳмонлар ҳимоячиси майдон эгалари ҳужумчисини унинг рафиқасини ҳақорат қилганликда ошкора айблади.

«Ўз жамоасига ўрнак бўлиши керак бўлган сардор (Ойарсабаль) менинг аёлимни ҳақорат қилиш учун оғзини қўли билан ёпиб олди», — деди Иглесиас журналистларга берган интервьюсида.

У рақиб футболчисининг «бу гапларни юзига айтишга ботинмаганини» қўшимча қилиб, уни мардлик етишмаслигида танқид қилди ва «бу ердаги қадриятлар мана шунақа», дея таъкидлади. Хуан айтилган сўзлар айнан рафиқаси Исабелга қаратилганини тасдиқлаган бўлса-да, аниқ нима дейилганини очиқламасликни афзал кўрди.

«Бу гаплар ўзимда қолгани маъқул», — дея хулоса қилди «Хетафе» ўйинчиси.