Мадриднинг «Реал» клуби ярим ҳимоячиси Дани Себальос, катта эҳтимол билан, жамоадаги сўнгги мавсумини ўтказмоқда. Испаниялик футболчининг шартномаси келаси йилнинг ўрталарига қадар мўлжалланган бўлса-да, «қаймоқранглилар» у билан шу ёздаёқ хайрлашиши кутилмоқда. Бу ҳақда нуфузли инсайдер Фабрицио Романо ўз ҳисоботида маълум қилди.
Потенциал харидорлар аллақачон «Реал» билан алоқага чиқишмоқда. 29 ёшли футболчига Амстердамнинг «Аякс» клуби ва яна иккита номи ошкор этилмаган жамоа даъвогарлик қилмоқда.
Дани Себальос 2017 йилдан бери Мадрид грандига тегишли. Жорий мавсумда ярим ҳимоячи 22 бор майдонга тушди, бироқ самарали ҳаракатлари билан ажралиб тура олмади. Transfermarkt портали футболчининг баҳосини 8 миллион еврога баҳолаган.
