«Барселона» ярим ҳимоячиси Френки де Йонг фаолиятидаги энг қийин рақиб ким эканлигини айтди. 28 ёшли нидерландиялик футболчи узоқ йиллар давомида Мадриднинг «Реал» клубида тўп сурган, ҳозирда эса «Милан» шарафини ҳимоя қилаётган Лука Модрични алоҳида қайд этди.
«Энг қийин рақибим? Лука Модрич», — дея де Йонгнинг жавобини келтиради Managing Barca.
Шунингдек, 28 ёшли футболчи жамоадошлари орасида энг кам баҳоланган ўйинчини ҳам танлади — бу ўтган йилнинг охирида фаолиятини якунлаган собиқ чап қанот ҳимоячиси Жорди Альба бўлиб чиқди.
Френки де Йонг 2019 йилнинг ёзидан бери «Барса» шарафини ҳимоя қилиб келмоқда. Яқинда у «кўк-анорранглилар» сафида ўзининг 293-учрашувини ўтказди — бу нидерландиялик футболчилар орасида клуб рекорди ҳисобланади.
