Миланнинг «Интер» клуби марказий ҳимоячиси Алессандро Бастонининг «Барселона»га ўтиши барбод бўлиши мумкин. Турли манбалар 26 ёшли футболчининг «кўк-анорранглилар» билан олдиндан келишувга эришгани ҳақида хабар берган бўлса-да, «нерадзуррилар» ўз юлдузини қўйиб юборишни асло истамаяпти.
FcInterNews маълумотларига кўра, «Интер» италиялик футболчи учун 70 миллион евро талаб қилишда давом этмоқда — «Барселона» эса бундай сўровни қондиришга тайёр эмас. Ҳатто келишувга каталонияликларнинг бир неча футболчисини қўшиш ҳам вазиятни ўзгартириши даргумон.
Машҳур Transfermarkt портали экспертлари Алессандро Бастонининг қийматини айнан 70 миллион еврога баҳолашмоқда. Марказий ҳимоячининг амалдаги шартномаси 2028 йилнинг ўрталарига қадар мўлжалланган.
