Бразилиялик ҳимоячи Данте футболчилик фаолиятини якунлашга тайёргарлик кўрмоқда. Ҳозирда 42 ёшли футболчи «Ницца» сафида тўп сурмоқда ва бошқа мусобақалар қатори Франция Кубоги финалида иштирок этишга ҳозирлик кўрмоқда.

L’Équipe нашрининг хабар беришича, келаси мавсумда Данте ўзи 2012 йилдан 2015 йилгача ўйнаган «Бавария» клубига қайтиши кутилмоқда. У мюнхенликларнинг ёшлар жамоасида мураббий сифатида иш бошлайди. Данте аллақачон УЕФАнинг профессионал мураббийлик лицензиясини қўлга киритган.

Унга собиқ жамоадоши, Франция терма жамоаси собиқ аъзоси Франк Рибери ҳам қўшилиши мумкин. Рибери мураббийлик лицензиясини олиш жараёнини якунлаш арафасида турибди ва у бразилиялик мутахассиснинг ассистенти (ёрдамчиси) этиб тайинланиши кутилмоқда.