«Бавария» клубининг собиқ ҳимоячиси Филипп Лам Мюнхен клубининг Бундеслигадаги ҳукмронлиги ҳақидаги мулоҳазалари билан ўртоқлашди.
Аввалроқ, Венсан Компани бошқарувидаги жамоа ўз тарихида 35-бор Германия чемпионига айланган эди.
«Бундеслига — жуда жозибадор лига. Бизда бой тарихга эга кўплаб буюк клублар бор. Албатта, яқин йиллар ичида биттадан кўпроқ чемпионга эга бўлиш (рақобат кучайиши) ажойиб бўларди. Аммо шуни ҳам тан олишимиз керакки, «Бавария» футболчиларни ривожлантириш ва халқаро маркетинг борасида ҳақиқатан ҳам улкан ишни амалга оширди.
Шунга қарамай, «Штутгарт» каби бошқа клубларда ҳам яқин йилларда ривожланиш учун имкониятлар албатта бўлади — агар улар Чемпионлар лигасида мунтазам иштирок этишда давом эта олишса», — деди Филипп Лам.
