«Ливерпуль» мухлислар кенгаши клубнинг асосий хўжайини Жон Генрига очиқ хат йўллаб, чипталар нархининг кейинги уч мавсум учун оширилиши қароридан сўнг «клуб ривожининг келажакдаги йўналишидан чуқур хавотирда» эканликларини билдиришди, деб хабар бермоқда PA.

Мухлислар кенгашининг инфляцияга боғланган нарх ўсишини музлатиб қўйиш ҳақидаги сўрови рад этилди. «Фулхэм»га қарши кечган сўнгги уй учрашувида норозилик акцияси ўтказилгач, ишқибозлар яна бошқа чораларни режалаштиришмоқда.

«Биз чипталар нархини уч йилга ошириш мажбуриятини олган биринчи клуб бўлиш қарорингиз борасида «Ливерпуль» мухлисларига қулоқ тутаётганингизга ишонмаймиз. Бу ушбу клуб ва умуман инглиз футболининг келажакдаги йўналиши борасида чуқур хавотир уйғотмоқда.

Мухлислар кўп йиллик нарх оширилишига ўз норозиликларини аниқ билдиришди. Бу нафақат нархнинг ўзи, балки унинг нимани англатиши билан боғлиқ: йиллик мазмунли мулоқотдан воз кечиш ва мухлислар кайфияти ёки молиявий воқеликдан қатъи назар, нархларни йиллар олдин белгилаб қўядиган моделга ўтишдир.

Бундай қарорлар, айниқса бир неча йилга мўлжалланганда, нафақат ҳозирги имкониятларга, балки келажакда кимлар ўйинга кела олишига ҳам таъсир қилади ва шу орқали клубнинг қандай бўлишини белгилайди. Мухлислар келажак авлодлар: фарзандлари ва набиралари аввалгидек стадионга кела олмасликларидан хавотирда», — дейилади очиқ хатда.

Нархлар ошишини асослаш учун «Ливерпуль» ўйин кунларидаги харажатлар 2016/17 йилги мавсумдан бери 85 фоизга ошганини кўрсатди. Клуб раҳбарияти катталар учун мавсумий абонементлар нархи уч йил давомида ҳар бир ўйин учун 3,5 фунтдан кўп бўлмаган миқдорда, оддий чипталар эса 3 дан 4,5 фунтгача қимматлашини таъкидламоқда.

Ҳозирда катталар учун чипталар 39 фунтдан 61 фунтгача сотилмоқда.