«Барселона» вингери Ламин Ямал куни кеча жароҳат олиб, мавсум охиригача сафдан чиқди. Жума куни 18 ёшли футболчи тикланиш жараёнини бошлаш учун Каталония клуби базасига ташриф буюрди.
Ямал базага етиб келаётгани акс этган кадрлар El Chiringuito кўрсатувида намойиш этилди. Эслатиб ўтамиз, Ламин Ямал «Сельта»га қарши ўйинда пенальтини голга айлантирганидан сўнг майдонга йиқилган ва шу заҳоти захирага олинган эди. Эртаси куни «Барселона» юлдуз футболчининг жароҳати борасида расмий баёнот берди.
Ҳозирда «Барселона» Испания чемпионатида «Реал»ни тўққиз очкога ортда қолдирган ҳолда пешқадамлик қилмоқда. Турнир якунигача олтита тур қолди.
