«Ювентус»нинг собиқ ҳимоячиси Маттиа де Шильо Криштиану Роналду билан бир жамоада ўйнаган кезларини ёдга олди.

Италиялик футболчи 2017 йилдан 2025 йилгача «бьянконери»га тегишли бўлиб, вақти-вақти билан ижарада тўп сурган. Португалиялик ҳужумчи эса 2018 йилдан 2021 йилгача Турин клуби шарафини ҳимоя қилган.

«Роналдуни кўрганингизда, бундай футболчининг ўйинини кузатиш имконияти ҳаётда фақат бир марта берилишини дарҳол тушунасиз. У кийиниш хонасидаги барчага муқаррар равишда таъсир ўтказади ва умумий мезонни (планкани) баланд кўтаради. Агар унга етишиб олишни истасангиз, 200 фоиз куч билан ишлашингиз керак бўлади. Криштиану — ўз ишига содиқлик ва профессионаллик намунаси, шу билан бирга, шахсий суҳбатда доимо ижобий кайфиятда бўлади, ҳазиллашишни яхши кўради.

Унга қарши ўйнаш ҳам ақл бовар қилмас — унутилмас тажриба эди. Унинг «Реал» сафида «Ювентус»га қарши ўйинда чалқанча услубда йўллаган зарбаси — бу шунчаки ўзгача воқеа», — дея ҳозирда клуби йўқ бўлган де Шильонинг сўзларини келтиради Al Nassr Zone.