«АЗ Алкмаар» ва Нидерландия терма жамоаси ярим ҳимоячиси Кес Смит «Барселона»га катта мамнуният билан ўтишини тан олди.
20 ёшли футболчини анчадан бери Европанинг топ-клублари кузатиб келишмоқда, бироқ хавбекнинг ўзи Каталонияга кўчиб ўтишга қатъий қарор қилган кўринади.
«Мен таътилимни Барселонада ўтказаман. Агар «Барса» музокаралар сўраса — мамнуният билан иштирок этаман. Бу менинг севимли жамоам, уларнинг барча ўйинларини кузатиб бораман», — дея Смитнинг сўзларини келтиради Barça Universal.
Узоқ вақт давомида чиқиб келаётган юлдуз учун курашда Мадриднинг «Реал» клуби фаворит сифатида кўрилаётган эди. Яқинда Нидерландия терма жамоаси устози Рональд Куман футболчини шахсан «Барселона»га тавсия қилиб, уни «Педри ва Френки де Йонгнинг қоришмаси» деб атаган эди.
Transfermarkt портали Кес Смитнинг қийматини 25 миллион еврога баҳоламоқда.
