«Милан» клуби «Брентфорд» сафида тўп сураётган бразилиялик марказий ҳужумчи Игор Тьягога қизиқиш билдирмоқда. Бу ҳақда Corriere dello Sport нашри хабар бермоқда.

Манбанинг маълумотларига кўра, «россонерилар» раҳбарияти ёзги трансфер ойнасида марказий ҳужумчи позициясини кучайтирилиши лозим бўлган асосий нуқта деб ҳисобламоқда. Тьяго эса потенциал вариантлардан бири сифатида аллақачон сотиб олиниши мумкин бўлган футболчилар рўйхатига киритилган.

24 ёшли ҳужумчи жорий мавсумда юқори натижадорлик кўрсатмоқда. «Брентфорд» сафида барча турнирларда 35 та ўйинда майдонга тушган Тьяго 24 та гол урди ва битта голли узатмани амалга оширди. Бразилиялик футболчи Англия Премьер-лигаси тўпурарлар пойгасида «Манчестер Сити» ҳужумчиси Эрлинг Холанддан учта тўпга ортда қолган ҳолда иккинчи ўринда бормоқда.

Нуфузли Transfermarkt портали Тьягонинг баҳосини 50 миллион еврога баҳолаган.