24 апрель куни ОФК Профессионал футбол қўмитасининг иккинчи йиғилиши бўлиб ўтди. Қўмита раиси — Парк Жи Сунг раҳбарлигида ўтган йиғилишда ОФК ва Осиёнинг қатор етакчи лигалари раҳбарлари, жумладан, Ўзбекистон Профессионал футбол лигаси бош директори — Диёр Имомхўжаев ҳам иштирок этди.

Қитъамиздаги клублар иштирокидаги профессионал мусобақаларга доир муҳим масалалар муҳокама қилинган йиғилишда 2026/2027 йилги мавсумдан эътиборан амалга оширилиши режалаштирилаётган ўзгаришлар тасдиқланди.

Хусусан, ОФК Элит Чемпионлар Лигасида иштирокчилар сони 24 тадан 32 тага етказилади. Бу эса мамлакатлар учун ажратилган квоталар сонига ҳам таъсир кўрсатади.

Ўзбекистон клублари учун мазкур мусобақага йўлланмалар сони 1+1 кўринишида бўлади. Яъни, Суперлига чемпиони — «Нефтчи» лига босқичига тўғридан тўғри йўл олса, вице-чемпион — «Пахтакор» ОФК Элит Чемпионлар Лигаси саралаш босқичида иштирок этади.

Агар «шерлар» саралашда муваффақиятсизликка учраса, ОФК Чемпионлар Лигаси 2 гуруҳ босқичида иштирок этади.

Ўзбекистон кубоги соҳиби — «Пахтакор» лигадаги ўрни орқали юқорироқ мусобақага йўлланма олгани сабабли, ОФК Чемпионлар Лигаси 2 учун квота Суперлигада 3-ўринни эгаллаган «Насаф»га тақдим этилади.

Шунингдек, йиғилишда ОФК мусобақаларига кириш регламенти ва ОФК клубларни лицензиялаш регламентига тегишли ўзгаришлар киритиш ҳам тасдиқланди.

Юқорида қайд этилган ўзгаришлар ОФК Ижроия қўмитаси томонидан тасдиқланган тақдирда, 2026/2027 йилги қитъавий футбол мавсумидан эътиборан кучга киради.