«Ювентус» марказий ҳимоячиси Федерико Гатти трансфер бозорида катта қизиқиш уйғотмоқда.
Инсайдер Николо Скиранинг хабар беришича, 27 ёшли футболчига Туркиянинг «Галатасарой» клуби даъвогарлик қилмоқда ва бўлажак келишув шартлари бўйича маълумот сўраган. Шунингдек, италиялик ҳимоячига «Наполи» ҳамда Англия Премьер-лигасининг бир қатор номаълум клублари ҳам қизиқиш билдирмоқда.
Федерико Гаттининг «Ювентус» билан амалдаги шартномаси 2030 йилнинг ўрталарига қадар мўлжалланган. Жорий мавсумда футболчи туринликлар сафида 25 та ўйинда иштирок этиб, ўз ҳисобига 4 та гол ёздириб қўйди. Transfermarkt портали марказий ҳимоячининг нархини 16 миллион еврога баҳоламоқда.
