Мураббий Хави Эрнандес «Барселона»да ишлаган вақтида йўл қўйган хатоси ҳақида сўзлаб берди. Испаниялик мутахассис жамоани 2021 йилнинг кузида қабул қилиб олган ва 2022/23 йилги мавсум якунларига кўра узоқ кутилган Ла Лига чемпионлигига етаклаган эди. Хавининг тан олишича, айнан шундан сўнг у бўшашишга йўл қўйган.
«Дастлабки бир ярим йил ичида мен ўта талабчан эдим. Футболчилардан, айниқса, клуб президенти Жоан Лапортадан кўп нарса талаб қилардим. Ла Лига ва Испания Суперкубогидаги ғалабадан сўнг, ўзим ҳам сезмаган ҳолда бўшашдим ва талабни пасайтириб юбордим. Бундай ҳолат келажакда такрорланмаслиги керак», — дея Хавининг сўзларини келтиради Испания ОАВлари.
Эслатиб ўтамиз, афсонавий собиқ ярим ҳимоячи 2024 йилнинг май ойида бош мураббийлик лавозимидан озод этилган эди. Унинг ўрнини Ханс-Дитер Флик эгаллаган.













