Аргентиналик ярим ҳимоячи, ҳозирда Италиянинг «Комо» клубида тўп сураётган Николас Пас фаолиятини Испания чемпионатида давом эттириши мумкин.
Инсайдер Фабрицио Романонинг ижтимоий тармоқлар орқали хабар беришича, Мадриднинг «Реал» клуби ярим ҳимоячини ортга қайтаришдан манфаатдор. Пас 2022 йилдан 2024 йилгача «қироллик клуби» аъзоси бўлган, шундан сўнг А Серияга йўл олган эди. Николаснинг «қаймоқранглилар» сафига ўтиши ёзги трансфер ойнасида амалга ошиши мумкин. Ярим ҳимоячининг ўзи «Реал»га қайтишга розилик берган.
Италия чемпионатининг жорий мавсумида Пас 32 та учрашувда майдонга тушиб, 12 та гол ва 6 та голли узатмани ўз ҳисобига ёздириб қўйди.
