«Барселона»нинг афсонавий собиқ ярим ҳимоячиси Хави Эрнандес Лионель Месси билан бирга ўйнаган кезларини ёдга олди. Испаниялик ва аргентиналик юлдузлар узоқ йиллар давомида «кўк-анорранглилар» шарафини бирга ҳимоя қилишган.

Мессининг Хави ва Иньеста билан ташкил этган боғлами ҳанузгача футбол тарихидаги энг яхшиларидан бири деб ҳисобланади, бироқ ҳатто ушбу афсонавий триода ҳам доим ҳам ҳамма нарса идеал бўлмаган.

«Баъзида бошқа футболчиларга пас берсам, Месси мендан хафа бўларди. У олдимга келиб: «Ҳей, нима қиляпсан? Тўпни менга бер! Яқинроқ кел, мен билан ўйна», — дерди», — дея Хавининг сўзларини келтиради Barca Universal.

Эслатиб ўтамиз, Хави «Барса»ни 2015 йилда тарк этган, кейинчалик эса у ерга мураббий сифатида қайтган эди.

Лионель Месси Каталония клубидан 2021 йилда кетган. Ҳозирда у «Интер Майами» шарафини ҳимоя қилмоқда.