«Манчестер Сити» бош мураббийи Хосеп Гвардиола Англия Кубоги ярим финалида «Саутгемптон» устидан қозонилган ғалабадан (2:1) сўнг вингер Жереми Докуни мақтаб ўтди.

Бельгиялик футболчи «шаҳарликлар»га ўйин якунида иродали ғалабани қўлга киритишда ёрдам берди: 82-дақиқада у ҳисобни тенглаштирган бўлса, 87-дақиқада Нико Гонсалесга голли узатмани амалга оширди. Шунингдек, Доку муваффақиятли алдамчи ҳаракатлар (дриблинг) бўйича ҳам ҳайратланарли кўрсаткич қайд этди — 14 та уринишдан 11 таси муваффақиятли чиқди.

«Докунинг охирги икки йил ичида ўсишга эришгани — ақл бовар қилмайдиган даражада. У нафақат дриблингда яхши, балки бурчак тўплари ишлаб олади ва катта хавф туғдиради. Унга қарши яккама-якка ҳимояланиш деярли имконсиз — рақибларга албатта ёрдамчи куч керак бўлади. Унга қарши икки-уч киши бўлиб ўйнашга мажбур бўлишади, уларнинг қанот ҳимоячиси жуда агрессив бўлиши лозим. Буларнинг барчаси бошқа футболчиларимизнинг эркин қолишига ва қўшимча бўш ҳудудларга эга бўлишига олиб келади», — дея Гвардиоланинг сўзларини келтиради City Report.

4 май куни «Сити»ни АПЛ доирасида «Эвертон»га қарши навбатдаги баҳс кутмоқда.