Ҳозирда БААнинг «Ал-Иттифоқ» клубида тўп сураётган ҳужумчи Марио Балотелли Италия футболидаги муаммолар ҳақидаги саволга жавоб берди. Италия терма жамоаси кетма-кет учинчи бор жаҳон чемпионати йўлланмасини қўлга кирита олмади: март ойи охирида жамоа ўтиш ўйинлари финалида Босния ва Герцеговина вакилларига пенальтилар сериясида имкониятни бой берди.
«Ҳозирги футболчиларда менда бўлган терма жамоага нисбатан туйғуларни кўрмаяпман. Замонавий ёшлар футболдан кўра телефонни афзал кўришади — шу сабабли янги талантларни кашф қилиш жуда қийин бўлмоқда», — дея журналист Николо Скира Балотеллининг сўзларини келтирмоқда.
Яқиндагина 35 ёшли ҳужумчи ЖЧ-2026да «скуадра адзурра» сафида ўйнашни орзу қилишини тан олган эди. Таъкидлаш жоизки, италияликларнинг мундиаллардаги охирги голини айнан Балотелли урган — бу воқеа олис 2014 йилнинг июнь ойида, Англияга қарши гуруҳ босқичи ўйинида содир бўлганди.
