Испания Ла Лигасида мавсумнинг энг шов-шувли трансферларидан бири амалга ошиши кутилмоқда. Мадриднинг «Атлетико» клуби «Барселона» ҳужумчиси Роберт Левандовскини ўз сафига қўшиб олишга жиддий қизиқиш билдирмоқда.

Келишув нега амалга ошмади?

Fichajes нашрининг хабар беришича, 37 ёшли польшалик ҳужумчи каталонияликлар билан амалдаги шартномани узайтириш бўйича музокараларда бир қарорга кела олмаган. «Барселона» футболчини яна бир мавсум жамоада сақлаб қолмоқчи бўлган, бироқ янги келишув шартлари тажрибали форвардни қониқтирмаган.

«Атлетико»нинг таклифи ва «17 та гол» шарти

Вазиятни диққат билан кузатиб бораётган Диего Симеоне жамоаси Левандовскига икки йиллик шартнома таклиф қилишга тайёр. Келишувда ҳамкорликни яна бир йилга узайтириш банди ҳам киритилиши мумкин, бироқ бунинг учун ҳужумчи зиммасига аниқ вазифа юкланади: у бир мавсум давомида камида 17 та гол уриши лозим бўлади.

Мадридликлар Левандовскини ҳужум чизиғини зудлик билан кучайтира оладиган ва жамоага етакчилик руҳини олиб кирадиган тажрибали ижрочи сифатида кўришмоқда. Футболчининг ўзи ҳам юқори даражадаги ўйинларини давом эттиришни истамоқда.

Даъвогарлар сафи кенгаймоқда

Польшалик юлдуз учун курашга Англиянинг «Манчестер Юнайтед» клуби ҳам қўшилиши мумкин. «Қизил иблислар» вазиятни синчковлик билан кузатишмоқда ва молиявий жиҳатдан Испания клубларидан кўра манфаатлироқ таклиф бериш имкониятига эга.