Туркиянинг «Фенербахче» клуби бош мураббий Доменико Тедеско билан хайрлашганини расман эълон қилди. Истанбулнинг «сариқ канарейкалари» раҳбарияти ушбу қарорни жамоанинг азалий рақиби «Галатасарой»дан учралган аламли мағлубиятдан (0:3) сўнг қабул қилди.

Тедеско ўтган йилнинг сентябрь ойидан буён жамоани бошқариб келаётган эди. Унинг қўл остида «Фенербахче» 45 та ўйинда майдонга тушиб, 26 та ғалаба, 12 та дуранг ва 7 та мағлубият қайд этди.

Ҳозирда Туркия суперлигаси якунланишига уч тур қолганда «Фенербахче» турнир жадвалида иккинчи ўринни эгаллаб турибди. Бироқ пешқадам «Галатасарой» билан орадаги фарқ етти очкога етган бўлиб, бу чемпионлик имкониятларини деярли йўққа чиқарди.