Таниқли футбол эксперти ва инсайдер Тимур Гурцкая «ПСЖ» дарвозабони Матвей Сафоновнинг Париждаги келажаги ҳақида янги маълумотларни ошкор қилди. Унинг сўзларига кўра, Франция гранди россиялик посбон билан амалдаги келишувни узайтириш устида ишламоқда.

«Мендаги маълумотларга кўра, ҳозирда «ПСЖ» унга яхшиланган молиявий шартлар асосида шартномани узайтиришни таклиф қилмоқда. Бу клуб унга тўлиқ ишонишидан далолат беради. Айтишларича, бутун жамоа уни яхши кўради, Сафоновнинг коллективдаги обрўси жуда баланд», — деди Гурцкая YouTube каналидаги чиқишида.

Эслатиб ўтамиз, Матвей Сафонов 1,5 мавсумдан буён «ПСЖ» шарафини ҳимоя қилиб келмоқда. «Краснодар»дан кўчиб ўтган дарвозабон жорий йилнинг қишида жамоанинг асосий посбонига айланди. У рақобатда Ренато Марин ва Люка Шевалье каби дарвозабонларни ортда қолдириб, «биринчи рақам» мақомини қўлга киритди.