«Манчестер Юнайтед» клуби ўз тарбияланувчиси ва жамоанинг асосий ярим ҳимоячиларидан бири Кобби Майну билан янги келишув борасида тўлиқ келишувга эришди. Бу ҳақда машҳур инсайдер Фабрицио Романо хабар бермоқда.
Янги шартнома 2031 йилнинг ёзига қадар амал қилади. Шунингдек, 21 ёшли футболчининг жамоадаги муҳим ўрнини инобатга олиб, унинг маоши ҳам сезиларли даражада оширилади. Манбанинг таъкидлашича, Майну янги битимга шу ҳафта ичида имзо чекиши мумкин. Расмий эълон эса жорий мавсум якунлангунга қадар амалга оширилади.
Кобби Майну Майкл Кэррик бошқарувидаги «қизил иблислар»нинг марказий чизиғида барқарор ўйин намойиш этмоқда. Жорий мавсумда инглиз ярим ҳимоячиси АПЛ доирасида 24 та учрашувда майдонга тушиб, ўз ҳисобига иккита голли узатмани ёздириб қўйган.
