Ла Лига президенти Хавьер Тебас «Реал Мадрид»нинг стадионлардаги камситиш ва зўравонликка қарши курашиш бўйича янги протоколдан норози бўлаётгани уни ажаблантирмаганини маълум қилди.
Аввалроқ, Мадрид клуби Ла Лигани ушбу протоколни жорий қилгани учун судга бергани хабар қилинганди. Клуб протоколга риоя қилиш мажбурий эмас, балки ихтиёрий бўлиши керак деб ҳисобламоқда.
«Реал» қилаётган ишларнинг ҳеч бири мени ҳайрон қолдирмайди. Улар бундан шикоят қилишяпти ва эҳтимол, яна бошқа нарсадан ҳам шикоят қилишади.
Уларга жамоавий ва мувофиқлаштирилган ҳаракатларни назарда тутувчи ҳеч нарса ёқмайди. «Реал» лиганинг клублар мутлақ кўпчилиги томонидан қўллаб-қувватланадиган мувофиқлаштирилган модель қарашларига қўшилмайди. Уларнинг президенти (Флорентино Перес) айтганидек, Ла Лига — бу «Реал» ва яна бошқа 19 та клуб демакдир», — деди Тебас.
