La Liga prezidenti Xavyer Tebas «Real Madrid»ning stadionlardagi kamsitish va zo‘ravonlikka qarshi kurashish bo‘yicha yangi protokoldan norozi bo‘layotgani uni ajablantirmaganini ma’lum qildi.
Avvalroq, Madrid klubi La Ligani ushbu protokolni joriy qilgani uchun sudga bergani xabar qilingandi. Klub protokolga rioya qilish majburiy emas, balki ixtiyoriy bo‘lishi kerak deb hisoblamoqda.
«Real» qilayotgan ishlarning hech biri meni hayron qoldirmaydi. Ular bundan shikoyat qilishyapti va ehtimol, yana boshqa narsadan ham shikoyat qilishadi.
Ularga jamoaviy va muvofiqlashtirilgan harakatlarni nazarda tutuvchi hech narsa yoqmaydi. «Real» liganing klublar mutlaq ko‘pchiligi tomonidan qo‘llab-quvvatlanadigan muvofiqlashtirilgan model qarashlariga qo‘shilmaydi. Ularning prezidenti (Florentino Peres) aytganidek, La Liga — bu «Real» va yana boshqa 19 ta klub demakdir», — dedi Tebas.
