Оқ уй вакили Дэвис Ингл Дональд Трампга ФИФА тинчлик мукофоти топширилиши бўйича янграган танқидларга муносабат билдирди.
АҚШ Президенти ушбу мукофотни ўтган йилнинг декабрь ойида, ЖЧ-2026 қуръа ташлаш маросими олдидан қабул қилиб олган эди.
«Дунёда тарихдаги илк ФИФА тинчлик мукофотига Президент Трампдан кўра муносиброқ инсон йўқ. Бошқача фикрлайдиган ҳар қандай одам шубҳасиз «Трампга муккасидан кетиш синдроми»нинг оғир шаклидан азият чекмоқда», — деди Ингл.
«Трампга муккасидан кетиш синдроми» — бу Дональд Трамп шахсияти ва сиёсатига нисбатан иррационал, ҳаддан ташқари салбий муносабатни ифодаловчи камситувчи атама бўлиб, ундан асосан Президент тарафдорлари фойдаланишади. 2025 йилда Миннесота штати Сенатининг беш нафар аъзоси ушбу ҳодисани руҳий касаллик сифатида тан олиш тўғрисидаги қонун лойиҳасини муҳокамага киритган эди.
