«Барселона» клубининг марказий ҳимоячиси Андреас Кристенсен учун Каталониядаги фаолият якунига етаётган бўлиши мумкин.
Sport нашрининг хабар беришича, 30 ёшли даниялик футболчининг амалдаги меҳнат шартномаси шу йилнинг ёзида ниҳоясига етади. Клуб раҳбарияти футболчига янги келишув таклиф қилган, бироқ унда маошнинг сезиларли даражада камайиши кўзда тутилган. Кристенсен эса молиявий шартлари анча пасайтирилган ушбу вариантга розилик бермаган.
Ҳозирда томонлар ўртасидаги келишув эҳтимоли паст баҳоланмоқда, бу эса ҳимоячининг ёзда жамоа билан хайрлашишини англатади. Қайд этиш жоизки, Андреас Кристенсен тиззасидан олган жароҳати сабабли ўтган йилнинг декабрь ойидан бери майдонга тушгани йўқ.
Эслатиб ўтамиз, даниялик футболчи 2022 йилнинг ёзида Лондоннинг «Челси» клубидан эркин агент сифатида «Барселона» сафига келиб қўшилган эди.
