«Челси» клуби ҳужумчиси Алехандро Гарначо фаолиятини Саудия Арабистонида давом эттириши мумкин.
MatchDay Central нашрининг хабар беришича, аргентиналик истеъдод соҳибини ўз сафига қўшиб олишга Ар-Риёднинг «Ан-Наср» клуби жиддий қизиқиш билдирмоқда. Саудияликлар агар лондонликлар футболчини сотишга рози бўлса, трансфер бўйича расмий таклиф юборишга тайёр.
Маълумот ўрнида, Алехандро Гарначо 2025 йилда «Манчестер Юнайтед»дан 46 миллион евро эвазига «Челси»га ўтган эди. Унинг «кўклар» билан амалдаги шартномаси 2032 йилнинг 30 июнига қадар мўлжалланган.
Жорий мавсумда 21 ёшли ҳужумчи барча мусобақаларда 41 та ўйинда майдонга тушиб, ўз ҳисобига 8 та гол ва 4 та голли узатмани ёздириб қўйди. Transfermarkt портали футболчининг айни дамдаги бозор қийматини 40 миллион еврога баҳоламоқда.
