«Манчестер Юнайтед» ярим ҳимоячиси Кобби Майну тез орада клуб билан амалдаги шартномасини узайтиради. Томонлар 2031 йилнинг ёзига қадар мўлжалланган келишув бўйича якуний хулосага келишган.

Daily Mail нашрининг хабар беришича, янги шартномага кўра 21 ёшли футболчининг маоши нақ 650 фоизга ошади. Агар ҳозиргача Майну ҳафтасига 20 минг фунт маош олиб келган бўлса, янги келишувдан сўнг бу кўрсаткич ҳафтасига 150 минг фунтни (тахминан 173 минг евро) ташкил этади.

Яқиндагина 21 ёшини қарши олган Кобби Майну «қизил иблислар»нинг асосий таркибида мустаҳкам ўрин эгаллашга улгурди. У ҳозирга қадар жамоа сафида барча мусобақаларда 98 та учрашув ўтказиб, 7 та гол ва 5 та голли узатмага муаллифлик қилган.