Ҳозирда «Ковентри» жамоасини бошқараётган Фрэнк Лэмпард ва унинг собиқ клуби «Челси» ўртасидаги яқин алоқалар ҳали ҳам сақланиб қолмоқда. Бу ҳақда Sky Sports бош мухбири Кавех Солхекол маълум қилди.
Инсайдернинг сўзларига кўра, Лэмпарднинг нафақат кўнгли, балки кундалик ҳаёти ҳам ҳамон Лондон клуби билан боғлиқ.
«Фрэнк Лэмпард ҳали ҳам «Стэмфорд Бридж» стадионига жуда яқин ҳудудда яшайди. Унинг оилавий ҳовлиси айнан ўша ерда жойлашган. Фрэнк бўш вақт топилди дегунча, «Челси» ўйинларига ташриф буюради. Мен уни бир неча бор стадиондаги клуб эгалари учун мўлжалланган ложада кўрдим. Шу сабабли, менимча, келажакда у яна «Челси»га қайтиши мумкин, аммо ҳозир эмас», — дейди Солхекол.
Эслатиб ўтамиз, Фрэнк Лэмпард мураббий сифатида «Челси»ни 2019–2021 йилларда ҳамда 2023 йилда бошқарган. Футболчилик фаолияти давомида эса у 2001 йилдан 2014 йилгача лондонликлар шарафини ҳимоя қилиб, жами 13 та совринни қўлга киритган ва клуб тарихидаги энг буюк футболчилардан бирига айланган.
