Испаниялик фахрий футболчи Санти Касорла ўзининг қадрдон клуби «Овьедо»да фаолиятини тез орада якунлашига ишора қилди.

Эҳтимол, унинг бу қарорига клубнинг муваффақиятсиз мавсуми ҳам таъсир ўтказиши мумкин — айни дамда «Овьедо» Ла Лига турнир жадвалида сўнгги, 20-ўринни эгаллаб турибди.

«Ҳар бир нарсанинг бошланиши ва якуни бор. Танам "тўхта" деган куни фаолиятимни тўхтатаман. Аммо ҳаётим барибир футбол билан боғлиқ бўлиб қолаверади», — деб ёзди 41 ёшли фахрий футболчи ижтимоий тармоқларда.

Эслатиб ўтамиз, испаниялик футболчи илгари Лондоннинг «Арсенал» клубида ҳам тўп тепган. У «канонирлар» сафида 2012 йилдан 2018 йилгача фаолият юритган.