Австриялик ҳимоячи Давид Алаба «Реал»ни тарк этади. Унга аллақачон бир қатор машҳур клублар қизиқиш билдирмоқда.
Гап, авваламбор, Туркиянинг «Галатасарой» ва Англиянинг «Манчестер Юнайтед» клублари ҳақида кетмоқда, бироқ рўйхат шу билан чекланмайди. Pianetamilan.it нашрининг хабар беришича, Алабанинг профили Италиянинг «Милан» клубини ҳам қизиқтириб қолган.
Тажрибали ҳимоячи Страхинья Павлович учун муносиб ўринбосар сифатида кўрилмоқда — ҳозирги вақтда «Милан»да бу позицияда захира варианти мавжуд эмас.
Шуни таъкидлаш жоизки, Италия клуби сўнгги йилларда фахрий футболчиларга, айниқса «Реал»ни тарк этаётганларга алоҳида эътибор қаратмоқда. Бунга ўтган йили Лука Модричнинг таклиф этилиши ҳам яққол мисол бўла олади.
Алаба 2021 йилдан бери «Реал» шарафини ҳимоя қилиб келмоқда.
