Психолог Карлос Диас Диего Марадонанинг ўлими бўйича очилган суд ишида кўрсатма берди. Аргентина терма жамоаси сафида Жаҳон чемпиони бўлган афсонавий футболчи 2020 йилда, жарроҳлик амалиётидан сўнг 60 ёшида вафот этган эди.
El Clarin нашрининг хабар беришича, Диас Марадонага нотўғри дори воситасини тайинлагани учун эҳтиётсизлик орқасида одам ўлдиришда айбланмоқда. У футболчининг ўлими учун жиноий жавобгарликка тортилган 7 нафар айбланувчидан биридир.
«Унда биполяр бузилиш ва нарциссизм белгилари бор эди. У бутун мамлакатни тиз чўктира оларди, бироқ бир қадаҳ ичимлик унинг ўзини тиз чўктириб қўйиши мумкин эди», — деди Диас судда.
Шунингдек, психологнинг таъкидлашича, Марадона ўз турмуш тарзини ўзгартиришни хоҳлаган ва даволаниш жараёнини спиртли ичимликлардан тийилишга мослаб тузатиб борган. Диас токсикологик хулосага таяниб, Марадонанинг ҳаёти 23 кун давомида ҳеч қандай тақиқланган моддалар истеъмол қилмаган ҳолатда якунланганини қайд этди.
