«Ливерпуль» ҳужумчиси Муҳаммад Салоҳ Стивен Жеррард билан суҳбат давомида кутилмаган совға қабул қилиб олди. Жеррард суҳбат чоғида Салоҳга жамоанинг собиқ устози Юрген Клоппнинг видеомурожаатини намойиш этди.

«Сен билан бирга ишлаш мен учун катта мамнуният ва шараф бўлди. Бу жуда ёқимли эди — ҳар дақиқада эмасдир, лекин вақтимизнинг катта қисмида (кулади). Эсингдами, бирга ишлашни бошлаганимизда мен: "Кел, шундай ажойиб тарих яратайликки, орадан 10, 15, 20 йил ўтиб ортга қараганимизда, юзимизда табассум пайдо бўлсин", дегандим. Ва ҳозир биз бирга ўтказган вақтлар ҳақида ўйлаганимда, юзимда айнан ўша табассум бор.

Мен ушбу йўлнинг бир қисми бўлганимдан жуда хурсандман ва миннатдорман. Келажакдаги ишларингда сенга фақат энг яхши тилакларни тилайман. Олдинда ҳали яна бир неча яхши йилларинг бор, шундай экан, бу вақтдан завқлан. Кўришгунча. Хайр!», деди Клопп.

Эслатиб ўтамиз, Юрген Клопп 2015–2024 йилларда «Ливерпуль»ни бошқарган ва ҳозирда «Ред Булл» тизимида фаолият юритмоқда.