«Манчестер Юнайтед» клубида апрель ойининг энг яхши футболчиси аниқланди. Ушбу эътирофга жамоадаги сўнгги мавсумини ўтказаётган ярим ҳимоячи Каземиро сазовор бўлди.
Бразилиялик футболчи якунланган ойда «қизил иблислар»нинг учта ўйинида иштирок этиб, ўз ҳисобига иккита гол ( «Лидс» ва «Брентфорд» дарвозаларига) ёздириб қўйди. Ўтган ойда бу соврин жамоа сардори Бруну Фернандешга насиб этган эди.
Эслатиб ўтамиз, Каземиро мавсум якунлангач, «Манчестер Юнайтед»ни эркин агент сифатида тарк этади. 34 ёшли футболчи ўзининг кетиши ҳақида ҳали январь ойидаёқ эълон қилган эди. Майкл Кэррик шогирдларининг май ойидаги илк учрашуви якшанба куни бўлиб ўтади — рақиб «Ливерпуль» жамоаси.
