Миланнинг «Интер» клуби ҳужумчиси Лаутаро Мартинес жамоанинг чемпионлигини таъминлаган «Парма» устидан қозонилган ғалабадан (2:0) сўнг интервью берди. «Нерадзуррилар» мавсум якунланишига уч тур қолганда А Серия турнир жадвалида иккинчи ўринда бораётган «Наполи»дан 12 очкога ўзиб кетди.
«Ўтган мавсумнинг муваффақиятсиз якунидан сўнг ҳаммасини оқ вароқдан бошлаш осон бўлмади. Бошида бизни фаворит ҳисоблашмаганди, лекин якунда тинимсиз меҳнат эвазига ўз мақсадимизга эришдик. Ҳозир жуда бахтлимиз. Бу лигада рақобат жуда кучли, аммо биз охиригача диққатимизни жамлай олдик. Мени ҳаммасидан кўра жамоамизнинг жипслиги кўпроқ ҳайратлантиради ва қувонтиради», — деди Лаутаро DAZN телеканалига берган интервьюсида.
