«Манчестер Сити» ярим ҳимоячи Фил Фоден билан шартномани узайтириш ниятида. Амалдаги келишув 2027 йилда ўз ниҳоясига етади, бироқ «шаҳарликлар» раҳбарияти ўз академиясининг юлдуз тарбияланувчиси билан ҳамкорликни давом эттиришга қатъий қарор қилган.

Журналист Пол Хёрстнинг маълумотларига кўра, томонлар янги меҳнат шартномаси бўйича дастлабки музокараларни бошлашган. Клуб сўнгги йилларда бироз пасайишни бошдан кечираётган футболчини тўлиқ қўллаб-қувватламоқда.

Фил Фоден жорий мавсумда Хосеп Гвардиола жамоаси сафида 45 та ўйинда майдонга тушиб, ўз ҳисобига 10 та гол ва 5 та голли узатмани ёздириб қўйди. Май ойи охирида англиялик футболчи 26 ёшни қарши олади.