Англия Премьер-лигаси 35-туридан ўрин олган «Челси» — «Ноттингем Форест» (1:3) учрашуви давомида лондонликларнинг 18 ёшли дебютанти Жесси Дерри биринчи бўлимдаги мажбурий алмаштиришдан сўнг эҳтиёт чораси сифатида шифохонага олиб кетилди.

Клуб матбуот хизмати маълумотига кўра, футболчининг аҳволи барқарор:

«Жесси ҳушида, гаплаша оляпти ва профилактик текширувдан ўтмоқда. Унга тезроқ соғайиш тилаймиз ва тиббиёт ходимларига тезкор реакция учун миннатдорлик билдирамиз», — дейилади баёнотда.

Ҳодиса биринчи бўлимга қўшимча вақтда содир бўлди. Дерри рақиб ўйинчиси билан боши билан тўқнашиб, майдонга йиқилди. Футболчига кислород ниқоби керак бўлди. Жароҳат олган ўйинчи ўрнига 45+10-дақиқада ҳужумчи Лиам Делап майдонга туширилди.