Лондоннинг «Тоттенхэм» клуби собиқ аъзоси Лукас Моура оғир жароҳат олди — у ахилл пайини узиб олди. Кўнгилсиз воқеа футболчи тўп сураётган «Сан-Паулу» ҳамда «Байя» жамоалари ўртасидаги учрашувнинг биринчи бўлими ўрталарида содир бўлди. Бу дегани, тажрибали футболчи жорий йилда бошқа майдонга туша олмаслиги мумкин.

Вазиятни янада мураккаблаштирадиган жиҳат шундаки, Моуранинг шартномаси шу йилнинг декабрь ойида якунига етади. Бразилия футболида ўйинлар «баҳор-куз» тизимида ўтказилгани сабабли, шартнома муддатлари одатда календарь йилига мослаб белгиланади.

Катта эҳтимол билан, Моура профессионал даражадаги сўнгги ўйинини ўтказиб бўлган бўлиши мумкин. Бироқ, жароҳатга қарамай, у барибир катта футболга қайтишга ҳаракат қилиши ҳам истисно этилмайди.