Лондоннинг «Арсенал» клуби дарвозабони Давид Райя Чемпионлар лигаси финалига йўл олгандан кейинги таассуротлари билан ўртоқлашди. Испаниялик посбон ярим финалнинг «Атлетико» Мадридга қарши жавоб учрашувида (1:0) «канонирлар» дарвозаси дахлсизлигини сақлаб қолишга ёрдам берди.
«Бу ҳақиқатга айланган орзу. Гап фақат мен ҳақимда эмас — биз бунга умумий ҳаракатларимиз билан эришдик. Чемпионлар лигасининг ушбу мавсумида бирор марта мағлуб бўлмадик ва жуда кам гол ўтказиб юбордик. Бу барчамиз ва бутун клуб учун ажойиб ютуқ», — деди Райя CBS Sports нашрига берган интервьюсида.
Микель Артета жамоаси Европанинг энг нуфузли турнирининг жорий мавсумида ўтказилган 14 та учрашувда ўз дарвозасидан атиги 6 та тўп олиб чиқди. «Арсенал»нинг финалдаги рақиби бугун бўлиб ўтадиган «Бавария» ва «ПСЖ» ўртасидаги баҳсда аниқланади.
