Мадриднинг «Реал» клубида Винисиус Жуниорнинг келажаги ҳали ҳам ноаниқ бўлиб қолмоқда. Томонлар анчадан бери шартномани узайтириш масаласини муҳокама қилишмоқда, бироқ молиявий шартлар бўйича келишувга эриша олишмаяпти. Журналист Рамон Альвареснинг хабар беришича, бразилиялик футболчининг агентлари йилига 30 миллион евро маош талаб қилмоқда, «қироллик клуби» эса фақат 20 миллион евро таклиф қилишга тайёр.
Шу билан бирга, манбага кўра, ҳужумчининг келаётган ёзда сотиб юборилиши эҳтимоли анча паст. «Реал» раҳбарияти муносиб ўринбосарни ҳамёнбоп нархда топиш қийин деб ҳисоблайди, шу сабабли юлдуз футболчи билан хайрлашишни истамаяпти.
Винисиус Жуниорнинг амалдаги шартномаси 2027 йилнинг ёзида якунига етади. Transfermarkt портали 25 ёшли ўйинчининг бозор қийматини 150 миллион еврога баҳолаган.
