«Арсенал» ярим ҳимоячиси Деклан Райс «тўпчилар» мухлисларини жорий мавсумдаги Чемпионлар лигаси финалига келишга чақирди. Турнирнинг ҳал қилувчи баҳси 2026 йил 30 май куни Будапештдаги «Пушкаш Арена» стадионида бўлиб ўтади.

«Қани, олға – мен тайёр бўламан. Будапешт, мен стадионда барча «Арсенал» мухлисларини кўришни истайман. 200 минг киши, келинглар! Келинг, бу оқшомни ҳақиқатан ҳам ўзига хос қилайлик. Мен доим айтганман, бу клуб – шунчаки клуб эмас. Бу — оила. Биз бир-биримизни қўллаб-қувватлаймиз. Айнан мана шу жипслик бизни ҳозирги даражамизга олиб келди», — дея Райснинг сўзларини келтиради машҳур инсайдер Фабрицио Романо ўзининг X ижтимоий тармоғидаги саҳифасида.

Эслатиб ўтамиз, «Арсенал» ярим финалда «Атлетико Мадрид»ни мағлуб этиб, финал йўлланмасини нақд қилган эди. Уларнинг финалдаги рақиби бугун тунда бўлиб ўтадиган «Бавария» — «ПСЖ» баҳсидан сўнг маълум бўлади.