«Фрайбург» ўз майдонида Европа Лигаси ярим финалининг жавоб учрашувида «Брага» устидан 3:1 ҳисобида ғалаба қозонди.
Меҳмонлар деярли бутун ўйин давомида бир киши кам бўлиб ҳаракат қилишди — 6-дақиқадаёқ Марио Доргелес қизил карточка олиб, майдонни тарк этди.
Мезбонлар сафида Лукас Кюблер дубль қайд этди. 33 ёшли ҳимоячи 19 ва 72-дақиқаларда рақиб дарвозасини ишғол қилди. Яна бир голга 41-дақиқада Йохан Манзамби муаллифлик қилди.
Португалия клубининг ягона жавоб тўпи 79-дақиқада Пау Виктор томонидан киритилди.
Икки ўйин натижасига кўра (биринчи ўйин — 1:2) «Фрайбург» зафар қучди ва Европа Лигаси финалига йўл олди. Германия клуби ўз тарихида илк бор еврокубоклар финалида иштирок этади.
