Мадриднинг «Реал» клуби ярим ҳимоячиси Орельен Тчуамени «Манчестер Юнайтед»нинг қизиқишлар доирасида қолмоқда. Яқинда франциялик футболчи нохуш воқеа иштирокчисига айланди: у жамоадоши Федерико Вальверде билан муштлашиб қолди ва ушбу можаро тафсилотлари оммавий ахборот воситаларига сизиб чиқди.
Ушбу воқеадан сўнг 26 ёшли хавбекнинг жамоани тарк этиши ҳақида миш-мишлар тарқала бошлади, бироқ бундай сценарийнинг амалга ошиш эҳтимоли ҳали ҳам паст. Инсайдер Фабрицио Романонинг маълумотига кўра, «Манчестер Юнайтед» Тчуаменининг ўйинига қойил қолади ва уни ўз позициясида дунёнинг энг яхшиларидан бири деб ҳисоблайди. Лекин манкунианликларнинг ушбу «орзудаги трансфери» амалга ошиши амримаҳол — «қаймоқранглилар» футболчини қўйиб юбориш ниятида эмас.
Transfermarkt портали Орельен Тчуаменининг қийматини 75 млн еврога баҳоламоқда, унинг амалдаги шартномаси 2028 йилгача мўлжалланган.
