Madridning «Real» klubi yarim himoyachisi Orelyen Tchuameni «Manchester Yunayted»ning qiziqishlar doirasida qolmoqda. Yaqinda fransiyalik futbolchi noxush voqea ishtirokchisiga aylandi: u jamoadoshi Federiko Valverde bilan mushtlashib qoldi va ushbu mojaro tafsilotlari ommaviy axborot vositalariga sizib chiqdi.

Ushbu voqeadan so‘ng 26 yoshli xavbekning jamoani tark etishi haqida mish-mishlar tarqala boshladi, biroq bunday ssenariyning amalga oshish ehtimoli hali ham past. Insayder Fabrisio Romanoning ma’lumotiga ko‘ra, «Manchester Yunayted» Tchuamenining o‘yiniga qoyil qoladi va uni o‘z pozisiyasida dunyoning eng yaxshilaridan biri deb hisoblaydi. Lekin mankunianliklarning ushbu «orzudagi transferi» amalga oshishi amrimahol — «qaymoqranglilar» futbolchini qo‘yib yuborish niyatida emas.

Transfermarkt portali Orelyen Tchuamenining qiymatini 75 mln yevroga baholamoqda, uning amaldagi shartnomasi 2028 yilgacha mo‘ljallangan.