Англия Премьер-лигасининг навбатдаги турида «Манчестер Сити» «Брентфорд»ни мағлуб этиб (3:0), пешқадам «Арсенал» билан орадаги фарқни 2 очкогача қисқартирди. Чемпионлик учун курашаётган ҳар икки жамоа ихтиёрида яна 3 тадан ўйин қолган.

Учрашувдан сўнг ўтказилган матбуот анжумани якунида «шаҳарликлар» устози Хосеп Гвардиола ўзига хос ҳаракат билан журналистлар эътиборини тортди. Мураббий жойидан туришдан олдин қўлларини юқори кўтариб, уларни чаппаштирган ҳолатда «крест» (X) белгисини кўрсатди. Маълумки, ушбу жест Лондоннинг «Вест Хэм» клуби рамзи ҳисобланади.

Бугун, якшанба куни «Вест Хэм» ўз майдонида «Арсенал»ни қабул қилади. Гвардиола шу тариқа бўлажак баҳсда «болғачилар»га мухлислик қилиши ва Лондон клубининг очко йўқотишидан манфаатдор эканига шаъма қилган.