Англия Премьер-лигасининг 36-тури доирасида кечган «Ливерпуль» ва «Челси» (1:1) учрашувидан сўнг, мерсисайдликлар ярим ҳимоячиси Райан Гравенберх ишқибозларнинг ҳаракатларига тўхталиб ўтди. Ўйин давомида «Энфилд» трибуналари ўз футболчиларининг манзилига ҳуштаклар чалишган эди.

«Бизга мухлисларнинг қўллаб-қувватлови жуда зарур. Тўғри, ғалаба қозона олмаяпмиз, лекин менимча, биз бундай муносабатга (ҳуштакларга) лойиқ эмасмиз. Мухлислар 90 дақиқа давомида биз билан бўлишлари керак. Иккинчи бўлимда улар бизни қўллаб-қувватлашни бошлаганида, биз рақибга босим ўтказишга муваффақ бўлдик. Бу биз учун сув ва ҳаводек зарур», — дея Гравенберхнинг сўзларини келтирмоқда инсайдер Фабрицио Романо.

Маълумот учун, «Ливерпуль» айни дамда АПЛ турнир жадвалида 36 та ўйиндан сўнг 59 очко жамғарган ҳолда 4-ўринни эгаллаб турибди.