Англиянинг "Ливерпуль" клуби "Монако" вингери Магнес Аклиушнинг хизматларига қизиқиш билдирмоқда.
L’Équipe нашрининг хабар беришича, мерсисайдликлар 24 ёшли француз футболчисини жамоа етакчиси Муҳаммад Салоҳнинг ўрнини босувчи асосий номзодлардан бири сифатида кўришмоқда. Маълумки, Салоҳ шу ёзда эркин агент сифатида клубни тарк этади. "Ливерпуль" раҳбарияти "Монако" футболчи учун тахминан 50 миллион евро талаб қилаётганига қарамай, музокараларга киришишга тайёр.
Аклиуш жорий мавсумда Франция Лиге 1 доирасида 6 та гол урди ва 7 та голли узатмани амалга оширди. Қайд этилишича, ушбу футболчи учун курашда "Тоттенхэм" клуби ҳам мерсисайдликларга рақобат туғдириши мумкин.
Бундан ташқари, "Ливерпуль" скаутлари Франция чемпионатида муваффақиятли иштирок этаётган "Ланс" ярим ҳимоячиси Мамаду Сангарени ҳам кузатишда давом этмоқда. Клуб ёзги трансфер ойнасида таркибни сезиларли даражада янгилашни мақсад қилган.
